Economìa ‘n Sicilianu: la nflazioni e li ricetti di la UE

La nflazioni è di tri tipi.

La prima è quannu la dumanna di beni e sirviza è chiôssai di l’offerta.

La secunna è quannu gira troppa munita rispettu a chidda chi servi.

La terza (ditta in inglisi “shock”) è quannu aumèntanu li prezzi di li materi primi.

La UE avi comu so missioni stituzionali chidda di tèniri bassa la nflazioni. E pi chistu la so banca, la BCE, ogni vôta ca li prezzi acchiànanu, fa acchianari macari lu tassu di ntrasuriu.

Picchì? Picchì lu tassu di ntrasuriu è lu prezzu di la munita: siddu acchiana la munita custa chiù cara e l’addumànnanu chiù picca. Addumannànnula chiù picca scinni la munità ‘n circolazioni e scinni videmma la nflazioni.

Nna lu rigimi UE non è possìbili ca cc’è nflazioni pi troppa munita, picchì la munita, puru ca sunnu li banchi chi dicìdinu quanta munita fari girari, è tenuta sutta cuntrollu di la BCE cu lu tassu di ntrasuriu. Si la dumanna acchiana troppu, iddi strìncinu la munita e fannu scìnniri li prezzi.

Ed è nzoccu stannu facennu macari ora.

Sulu ca ora cc’è un erruri. La nflazioni di ora non è pi la troppa dumanna, ma pi lu “shock” di l’offerta. Sunnu li prezzi di li beni mpurtati ca acchianaru. Chì succedi dunca quannu avemu na nflazioni di stu tipu?

Si nuàutri cunzidiramu ferma l’offerta, vali chidda ca li economisti di na vôta (li keynesiani) chiamàvanu la “curva di Phillips”, chi si po arridduciri tutta nna sta frasi: “Si vo’ fari calari la disoccupazioni, accuntèntati di nanticchiedda di nflazioni”. Lu shock di l’anni ’70 ni fici capiri ca sta liggi, quannu l’offerta cancia non è chiù bona.

Ora, quannu diminuisci l’offerta, li prezzi ànnu ad acchianari macari ca cc’è disoccupazioni, a lu cuntrario di la liggi di Phillips: si chiama “stagflazioni”. ‘Un cc’è nenti di fari. Si tu, quannu c’è calu di l’offerta, fa calari macari la dumanna, certu, la nflazioni ti scala, però….

Però, a stu novu niveddu di pruduzioni, la disoccupazioni acchiana macari chiôssai di chiddu c’avissi succidutu s’un avissi fattu nenti.

Veru è ca lu tassu riali (livannu la nflazioni) forsi è negativu, e chi pi lassallu fermu ‘n tèrmini riali l’âm’a fari acchianari nantincchia. Ma la virità è ca lu tassu riali, si cc’è shock aviss’a scìnniri non acchianari, picchì vasinnò la pruduzioni si distruji e la disoccupazioni mpazzisci.

Chi è nzoccu sta facennu propiu la UE. Acchianari li tassi mentri cc’è contrazioni di l’offerta è na speci di suicidiu.

Chiddu c’un aju caputu ancora è si nun lu sannu, e sbaghiano picchì ànnu na tiorìa sbaghiata, o puru lu sannu e vônnu veru distrujiri tuttu?