Cummenti di nutizi ‘n Sicilianu

Oji parramu di quattru nutizi chi riguàrdanu la nostra Sicilia na st’ùltimi simani.

‘Un è fàcili truvarli di sti tempi, pirchì pari ca esisti sulu lu Covid. Ma mentri nuàutri parramu di lu Covid di la matina a la sira, ni stannu sfilannu la burza…

Circannu bonu li nutizi ci su’ e cca nni videmu tri pìnnuli sulamenti.

LU CUVERNU MPUGNA LA LIGGI SUPRA A LI STIPENNI DI LI DIRIGENTI RIGIUNALI

La nutizia è chista: lu ministru ‘talianu Gelmini (sì, chidda chi sfasciau l’universitati cu la so famusa controriforma) mpugnau davanti a la corti custituzionali la liggi siciliana chi aggiorna li stipendi di li dirigenti rigiunali.

Sapemu che cu sti mpugnativi lu cuvernu sapi d’èssiri sicuru. Quannu si parra di Rigiuni e di stipenni, li citatini sunnu tutti d’accordi ca la meghiu cosa è chidda di livàricci soldi, tantu non li sannu spènniri e fussiru jittati. Poi cc’è la mmidia sociali, etc. Ma, livamu sti discursi di cafè e ragiunamu cu la testa.

Ogni amministrazioni, comu mìnimu, av’a èssiri lìbira di gestiri li so risursi umani. Un’amministrazioni chi non po mancu stabiliri quantu su’ li stipenni di li propri dipinnenti è n’amministrazioni mortificata. Poi si po’ discurriri, nna lu mèritu, si st’aumentu è giustu o puru no. Non è chistu lu problema. 

Lu Statutu duna a la Rigiuni cumpitenza esclusiva nna li materi di li propi dipinnenti, cu l’ùnicu òbligu di non putiri scìnniri, comu ritribuzioni, sutta a lu mìnimu privistu pi li statali. Basta, stop, non cc’è àutru!

Lu Cuvernu rigiunali, poi, rispunni di li so azioni supra a tutti li campi pi li quali avi cumpitenza esclusiva o cuncurrenti, sulamenti a lu nostru Parlamentu, bonu o tintu chi è…

Lu veru scopu di lu cuvernu talianu, non è stari attentu a l’equilibri finanziari di la Sicilia (chi anzi cuntribuìu a sfasciari) ma di murtificari la dirigenza rigiunali, fari sèntiri a la Rigiuni tutta la so nfiriorità a frunti di lu Statu, nzumma, fari capiri cu cumanna, scarpisannu li nostri Stituzioni.

Rimediu? Formalmenti cci vulissi l’Àuta Corti pi la Sicilia e turnari a la mpugnativa sulu di lu Cummissariu di lu Statu, cioè turnari a lu Statutu. Ma sustanzialmenti cci vônnu li ndipennentisti a Roma, a lu Sinatu, chi tennu a dritta lu Cuvernu talianu e chi ànnu lu putiri di farlu càdiri quannu si comporta mali comu nna stu casu. La Questioni è di principiu, si poi lu dirigenti è pagatu picca o assai chisti sunnu discursi nostri, c’âm’a dicìdiri a la nostra casa. Non ni lu facemu diri certu d’un ministru romanu.

LA RIFORMA FISCALI DI LU PRISIDENTI DRAGHI LEVA PÌCCIULI A LA SICILIA

Àutra mala notiza riguarda lu canciu di la curva di l’IRPEF. In linia di principiu fussi na cosa giusta, s’un fussi ca nna lu stissu mentri ti scàlanu li tasci e ti lèvanu l’assegni familiari.

Lu cuntu è però ca la Rigiuni, si scala lu jèttitu fiscali, non sapi comu av’a cupriri li pirtusa. Lu Statu acchiana e scinni li tasci, ma sapi comu fari pi cummighiari cu un strumentu zoccu scummoghia cu nàutru. La Rigiuni arresta scuperta… Si ni dàssiru la cumpleta autonomìa finanziaria, putìssimu rimidiari, ma accussì lu Statu aviss’a stabiliri quali risorsi aggiuntivi si dùnanu a la Sicilia a cumpinzazioni di chiddi ca sta pirdennu, altrimenti semu sempri dda.

TORNA LU RIGIUNALISMU DIFFIRINZIATU

Si stà ncardinannu la liggi vuluta di li rigiuni di lu Nord. Chistu l’âmu dittu sempri. Si li tributi chi matùranu nna la Sicilia, ca ni spèttanu pi l’art. 37 di lu Statutu e pi lu Dicretu 1047/1965, non tòrnanu cca, cc’è lu rìsicu ca zoccu oji n’arrobba lu Statu, dumani ni l’arròbbanu direttamenti li rigiuni di lu Nord: livari a cu’ avi picca e dari chiôssai a cu’ già avi… E chistu senza mancu parrari di li niveddi essenziali di prestazioni o di la perequazioni frastrutturali di lu nostru artìculu 38. Comu sempri la Sicilia è addifinnuta di nuddu.

LI NDIPENNENTISTI SARDI SUNNU CUNTRARI A L’INSERIMENTU DI L’INSULARITATI NNA LA CUSTITUZIONI ‘TALIANA

L’ùltima nutizia parissi macari bona: lu Statu metti nna la Custituzioni l’insularitati. Certo è n’affermazioni di principiu puru. Pari ca li pruvvidenzi duvuti pi sta condizioni sunnu dicisi di lu Statu e basta. Ma non è così. Nuàutri putìssimu rivinnicari l’attuazioni ntigrali di lu Statutu, macari cu li so parti eccezionali, nta lu nomu di st’insularitati. Nzumma, è na questioni puramenti nominali.

Na cosa ca mi curpìu fu ca li ndipennentisti sardi di Sardigna Natzioni sunnu cuntrari. Liggennu li so mutivazioni capisciu ca l’immaturitati di àutri ndipinnnentisti è ancora granni, veru granni!

Lu primu motivu è pirchì l’insularità fussi na patenti di nfiriorità e di dipinnenza di lu Continenti. Dìcinu li Sardi: siddu accittamu stu passaggiu voli diri ca stamu ammittennu ca la Sardigna non po èssiri autosufficienti. Allura, a stu puntu, addumannati puru l’abolizioni di l’autonomìa spiciali. Lu ragiunamentu “o tuttu o nenti” non mi cumminci. Ju dicu: si fùssimu ndipinnenti non avìssimu bisognu di nenti, ma vistu ca accamora semu na colonia di l’Italia, livàmucci a l’Italia tuttu zoccu ni putemu pighiari. Si, cu l’insularità, pozzu attivari finalmenti l’artìculu 36 di lu Statutu pi la fiscalitati di vantaggiu, chi fazzu? Dicu No! Non lu vogghiu, vasinnò signìfica ca aju bisognu d’un trattamentu spiciali… Ma certu c’avemu bisognu d’un trattamentu spiciali. La Sicilia stà murennu, e qualunchi strategìa ni po sarbari è binvinuta.

L’àutra motivazioni fa vèniri ‘i ridiri… Puru pirchì è l’oppostu. Non la vonnu pirchì la stannu dannu macari a li Siciliani e ci tuccassi sulu ad iddi…chi sunnu “chiù ìsula” ‘i nuàutri…. No comment.

Ma accussì ùnni avìssimu a jiri?

Menu mali ca sugnu sicuru ca non tutti li Sardi la pènzanu comu a Sardigna Natzioni e non pènzanu ca la ndipinnenza di la Sardigna passa pi fari na guerra a la Sicilia.

Segui l’autore di questo blog su https://t.me/Massimo_Costa