Pìnnuli di sicilianu – Dumanni ntra cristiani ca si ncòntranu

Si dici ca oji parrari ‘n sicilianu è chiù difficili ca scrivirlu.

Accussì dicidivi di gràpiri na rubrica ‘n sicilianu pi vìdiri si sapemu usarlu cu li paroli e li sprissioni di tutti li jorna. Pinzàmula comu  na lingua ufficiali, usata sempri a lu postu di lu talianu.

Oji facemu diàloghi di du’ cristiani ca si ncòntranu.

Addumannari a unu comu si chiama (nfurmali).

Ju sugnu Marìa, e tu còmu ti chiami?

Addumannari a unu comu si chiama (furmali).

Ju sugnu lu dutturi Di Paola, e vossìa còmu si chiama?

Addumannari a unu di quali citati veni.

Sugnu di Girgenti. E tu (di) dùnni si’?  [E vossìa (di) dùnn’è?]

Addumannari a unu nzoccu studìa, nzoccu fa,….

Ju studìu economìa. E tu nzòccu studìi?

Ju fazzu la putiara. E vossìa chì travaghiu fa?

Addumannari a unu unni stà.

Ju staju a Sarausa. E vossìa ùnni stà?

Ju àbitu nna la Strata di la Libirtati, e tu ùnni àbiti?

Addumannàricci a unu l’etati.

Ju aju 22 anni. E tu quànt’anni ai?

Ju sugnu di lu 1975, e vossìa di quànn’è?

Addumannàricci a unu comu stà.

Oji ‘un mi sentu tantu bonu. E tu còmu ti senti?

P’accamora n’accuntintamu di sti pìnnuli. Si vi piacìu na vota a la simana putemu cuntinuari.